JERUZALEM, ISRAEL (AFP).- E kansier israelí, Israel Katz, a menasá pa start ku un “guera total” kontra e movementu islamita libanes Hezbolá, respaldá pa Iran, despues di simannan di pelea na e frontera dje paisnan.
“Nos ta hopi serka dje momento pa disidí pa kambia e reglanan di wega kontra di Hezbolá i Libanon. “Den un guera total, Hezbolá lo keda destruí i Libanon lo haña un gòlpi duru”, segun Katz a atvertí den un komunikado.
Segun e minister israelí, e hefe di Hezbola, Hasan “Nasrallah, djamars a saka potrètnan di e haf di Haifa, operá pa empresanan internashonal chines i indio, i a menasá ku daña nan”.
Un ratu promé, i pareu ku un bishita na Beirut di Amos Hochstein, enviado spesial dje presidente merikano Joe Biden, pa purba baha e tenshon na e frontera entre Israel i Libanon, Hezbolá a publiká algun potrèt di Haifam ku ta un siudat ku haf na nort di Israel. Segun nan ta bisa, e potrètnan a keda saká ku drone,
Riba e video, Hezbolá ta identifiká algun lugá manera infrastruktura militarnan i energétiko, i otro manera instalashonnan sivil.
Hochstein a reuní djaluna ku e promé minister israelí, Benjamin Netanyahu, na Jeruzalem, i despues a biaha pa Libanon.
“E konflikto entre Israel i Hezbolá ya a dura demasiado”, segun Hochstein na Beirut, kaminda el a reuní ku e presidente di Parlamento, Nabih Berri.
E situashon ta grave, segun Hochstein, kende a sigurá ku Washington ke evitá ”un guera grandi”.
E frontera entre Israel i Libanon ta esenario di interkambio di tirunan kasi tur dia despues ku dia 7 di òktober a start ku e guera entre Israel i e movementu islamita palestino Hamas den Gaza.
Por lo ménos 473 persona a muri na Libanon despues di mas di ocho luna di atake na frontera, e mayoria kombatientenan, pero tambe 92 sivil.
Di parti di Israel, sigur 15 sòldá i 11 sivil a muri, segun outoridatnan.
