HERUSALEM, AFP.- Israel ta kuminsá ofresé e terser dósis di vakuna kontra COVID-19 pa tur hende riba 60 aña, segun indikashon di Promé Minister Naftali Bennett djaweps. E desishon ta hasi Israel e promé pais ku ta ofresé un “booster shot” di COVID.
Lo kuminsá ku e terser dósis djadumingu, komo parti di “un kampaña komplementario di vakunashon” pa tur esnan riba 60 aña. E israelínan ku lo haña un terser dósis mester ta kompletamente vakuná pa mas di sinku luna kaba.
Outoridat a reportá ku a vakuná alrededor di 55% di e poblashon di nuebe mion, despues ku a lansa un kampaña masivo na fin di desèmber despues di un akuerdo ku fabrikantenan di Pfizer-BioNTech.
Israel a suavisá mayoria restrikshon di COVID na komienso di yüni pa motibu ku e kasonan di infekshon a baha. Pero ministerio di salubridat a bolbe imponé uso di tapaboka den espasionan públiko será.
Israel a reportá 1.400 kaso di COVID den 24 ora. Outoridat a identifiká mas di 15.000 kaso aktivo i 151 persona ta hospitalisá segun indikashon di ministerio di salubridat.
