WILLEMSTAD.- Ayera nochi Fundashon J.A.G. a reuní ku medionan di komunikashon relashoná ku marchanan di Karnaval. Manera ta tradishon radio emisoranan ta kore dilanti di e marcha pa dje forma ei informá pueblo na unda e kabes dje Karnaval ta. Juni Aniceta i Stanley Ignacio di J.A.G a reuní ku miembronan di prensa i a hasi un súplika na nòmber di Kuerpo Polisial pa e radionan tene 3 palu di lus di distansia for di e kabes dje marcha, loke ta ser yamá e protokòl di e marcha di Karnaval. A pidi mesora tambe pa no opstakulisá e marcha dor di por ehèmpel baha i saka potrèt. A pidi tambe pa evitá bahamentu for di outo. Konhuntamente a disidí ku na kabes dje radionan lo tin 1 emisora ku personal ku tin eksperensia di move na kabes dje marcha, meskos na final dje radionan 1 ku tambe tin eksperensia, dje forma ei ta mantené esnan ku ménos eksperensia mei mei i por tin un mihó maneho riba e moveshon dje vehíkulonan. Riba foto momentu ku e reunion tabata tumando lugá i e koleganan representante di nan medionan di komunikashon presente.