MERKA.- E astro kolombiano di reggaeton a kita Drake for di e promé puesto di e plataforma di ‘streaming’ musikal ku un total ku ta superá 48 mion di oyente mensual.
‘E úniko kos ku mi por bisa ta danki, danki, mi ta hopi agradesí i orguyoso’, asina Balvin a bisa den un komunikado ku a keda emití djaluna último.
‘Esaki ta mas grandi ku J Balvin, ta un movementu i na spañó. Nos ta demostrando ku e latinonan tin e poder di konektá ku e oudiensia na nivel mundial sin ku laga nos identidat atras. Esaki ta un logro pa e komunidat latino kompletu’, asina e intérprete di ‘Mi gente’, ‘X’, ‘Machika’, ‘Familiar’ i tur e sobra éksitonan.
Spotify den un otro komunikado a bisa ku Balvin a traha su nòmber ku ‘singles’ i albùmnan ‘hipnotiko’ di muzik urbano loke a pone bira un dje artistanan latino mas destaká kapas pa krea éksitonan instantanio ku ta zona serka miónes di hende.
Aña pasa su ‘single’ ‘Mi Gente’ tabata e promé kansion kompletamente na spañó ku a yega number 1 di e Top 50 global di Spotify i Balvin a kontinuá traspasá frontera ku su kolaborashonnan ku Beyonce i Cardi B. Su mas resien ‘single’ ku Nicky Jam ‘X’ a keda reprodusí mas ku 327 mion di biaha riba e plataforma.
J Balvin no ta e úniko latino ku a yega # 1 global riba Spotify. Na 2017 otro famoso ‘reggaetonero’, e astro portorikeño Daddy Yankee a logra esaki. Segun Spotify na 2017 e streaming di músika Latino a krese ku 110%.