WILLEMSTAD.- Trabounan ta avansando i manera ‘Louie Louie’ a indiká siman pasá den su kolumna tur kos ta indiká ku den luna di òktober e empresa Japan N.V. lo inougurá un ‘Entertainment Center’ nobo ku dos sala ku un kapasidat di mas o ménos 2000 hende.

‘DEN E BEMBE’ a risibí splikashon amplio dje proyekto, kaminda lo bai ofresé promotornan i organisadónan di evento e posibilidat pa hasi uso un sitio pa organisá aktividat kaminda e preis lo ta muchu mas kumbiniente i ku oportunidat ku e organisadó dje evento mes lo por tin su bar.

Pa loke ta trata e edifisio mes, mester indiká ku trabounan ta basta leu i ku ta wardando e sobrá kòmprèsernan di èrko yega pa kaba di instalá esakinan. E persona ku ta enkargá ku e edifisio a sigurá ku tur kalkulashon a keda hasí i ku ámbos sala lo ta bon friu pa kualke aktividat.

Lugá di parker lo no ta un problema debí ku dilanti dje edifisio tin un parkerplaats amplio. Finalmente nos a komprondé ku ya tin un agènda i interes pa organisá evento den e ‘Entertainment Center’ ta bayendo den bon direkshon. Riba fotonan nos por tuma nota djaserka riba e edifisio i trabounan ku ta tuma lugá.