WILLEMSTAD.- Akademia di Músika Edgar Palm, e skol di muzik di Sentro Kultural Kòrsou (“CCC”), a sera aña eskolar sumamente satisfecho ku prestashon di su alumnonan.
Motibu pa èkstra orguyo ta e logronan di 2 alumno di piano, Jarich Adamson i Aemil Palm. Jarich Adamson a sigui un preparashon intensivo bou di guia di pianistanan Enrico Henriquez i Carolina Nicolaas pa e parti práktiko.
Serka Etzel Provence el a sigui lès di teoria nivel C. Esaki ta un lès di un nivel bastante avansá ku un eksámen pika, ku si bo pasa esaki bo por pasa e oudishon teorétiko di kualke konservatorio sin problema.
Resientemente e hóben aki a bai Ulanda pa bai pasa prueba di atmishon na e konservatorio di Rotterdam, Codarts. Despues ku el a regresá Kòrsou bèk el a risibí e grato notisia ku el a slag pa drenta e konservatorio. Pronto Jarich lo sali pa Ulanda pa kontinuá su estudio di piano na nivel profeshonal. Ku esaki Jarich Adamson ta kontinuá un tradishon largu di alumnonan ku a risibí preparashon musikal na CCC pa por drenta konservatorionan na Merka i Ulanda.
Aemil Palm a kibra rekòr dor di slag pa 3 sertifikado di piano den 1 luna di tempu. Eamil ta bisañetu di e konosido kompositor yu di Kòrsou, Albert Palm. Su dosente di piano na CCC ta Norman Moron.

Aemil Palm i Normon Moron ku e 3 sertifikadonan.