WILLEMSTAD.- Ayera tardi durante dje rueda di prensa di Fundashon Kultural Seú Kòrsou a presentá e dos baluartenan pa selebrashon di fiesta di Seú 2020.
Jasmin ‘Jessy’ Casper i Glenn Thomas ta e baluartenan i nos mester bisa ku e eskoho tabata tremendo. Dos persona ku meresé di a keda rekonosé dje forma aki. Nan dedikashon na nos kultura durante di añanan ta di aploudí i loke mas ta di apresiá ta e echo ku ketu bai nan ta duna nan aporte na e desaroyo di esaki.
Jasmin Casper
Jasmin (Jessy) Casper nasé dia 6 di yanüari 1961 na Kòrsou. Lantá den e bario di Otrobanda ku su mama i su tata i su 6 rumannan (3 hòmber i 3 muhé), di kual Jasmin ta e yu mayó.
Su karera artístiko a kuminsá dia 1e di sèptèmber aña 1976. Jasmin ta bailarina, modelo i tambe kabesante di su mes grupo di baile i modelahe (Grupo Teremoto) i ku su propio organisashon (J.W. Organization).
Jasmin a sigui diferente kurso e.o: di kose, modelahe i di makiahe. Jasmin ta bailarina di e grupo di baile folklóriko Dushi Kòrsou i a representá Kòrsou na diferente pais, e.o. Venezuela, Aruba, Boneiru, Bèlgika, New York, Brasil, Cuba i Trinidad.
Tambe e ta un aktris ku a aktua den diferente obra teatral i ta fotomodel pa entre otro Sambil.
Jasmin ta un dosente di baile moderno i folklóriko ku ta duna lès na skolnan i na diferente organisashonnan. Tur aña durante siman di ban lesa, Jasmin ta duna tayer di baile na diferente skol. Tur aña, pa 3 luna largu e ta duna tayer di baile na Fina Dancers. Durante festival di tumba e ta bailarina pa diferente tumbero. Jasmin ta maradó di lensu folklóriko.
Aktualmente na Mega Pier, Jasmin ta risibí turistanan ku un bunita baile, ku nos trahe nashonal. Durante añanan Jasmin a haña tambe diferente rekonosimentu i premio pa su trabounan.
Glenn Teofilo Thomas
Glenn Thomas a nase dia 3 novèmber 1963 i mayoria di su añanan di su bida te ku awe e ta bibando den Brievengat.
Na aña 2004 huntu ku su tim konsistiendo di Giovanni Gijsbertha, Jewel Melendez, Elia Isenia el a kuminsá dokumentá historia di nos Seú. ‘Drèmpi di Mangazina’ tabata nòmber dje dokumental aki kaminda el a entrevista diferente di nos baluartenan manera Victor “ Vi” Batholomeus, Nacho Gertruida komo supladó di kachu, dr Rene Rosalia. Glenn, bayendo den kunuku, i papiando ku mas di nos grandinan pa e por siña i eduká otronan via di su programanan tantu na radio komo televishon. ‘Drèmpi di Mangazina’ a haña un akohida enorme pasando na televishon lokal e internashonal.
Aparte di esei Glenn tabatin su programanan di seú ku tabata pasa durante boletin di Telenotisia na TeleCuraçao: “Un tiki di seú”; “Andana”; “Un krenchi di seú” etc, tur den kuadro di duna informashon na pueblo kiko Seú ta kome i bebe.
No tabata fásil pa konsientisá pueblo i e tabata haña asta enemigu pa esei pero e no a entregá i a sigui informá i eduká tokante di seú, informashonnan ku el a dokumentá kanando den kunuku pa hopi tempu ku nos grandinan.
For di aña 2000 el a drenta den grupo di seú i partisipá aktivamente, pero el a skohe pa bai den un grupo kaminda e por a identifiká su mes kuné basá riba loke el a dokumentá i siña di nos grandinan , esei a resultá grupo OBA di Jipi i Joyce Domitilia.
Glenn ta partisipá te ainda den seú tambe ku e grupo Los Paranderos komo tokadó. Su deseo ta pa Seú keda nos marcha di kosecha manteniendo e base, por modernisá pero bo no por modernisá algu ku bo no konosé. Glenn su lema semper: Yobida di shelu ta fortalesa pa mama Tera.