WILLEMSTAD.- Djabièrnè último ‘Jay Stax’, (Jared Statie) a resultá e ganadó apsoluto di Curaçao DJ Battle. Den un bataya den Club Vanilla el a sa di derotá 4 otro kolega DJ pa por a logra e título. Ku esaki Jared tin e derechi di habri ‘The Flying Dutch Curaçao’ ku un presentashon riba e tarima prinsipal dje evento.
E tenshon tabata haltu djabièrnè último den Club Vanilla na momentu ku 5 dj a kuminsá presentá den e promé rònt, despues ku nan tabatin 1 siman pa prepará. Den kuater rònt a disidí ken ta e dj mas mihó. Un parti dje kompetensia tabata pa toka mas tantu piesa den 2 minüt. Despues nan a risibí un USB stick di sorpresa ku músika riba dje ku no tabata konosí sino ta e momentu ei. Pa último, e dos dj-nan ku a sobra, Dj Miigo i Jay Stax a enfrentá otro den un tremendo battle.
Finalmente Jay Stax, 18 aña, a keda koroná komo e ganadó apsoluto di ‘Curaçao DJ Battle’ i a risibí for di man di e hurado e premionan mayó, pa kortesia di L’Amiga. ‘Un ganadó ku a meresé’, asina Egon Sybrandy di Sterck Events, e organisadó di ‘The Flying Dutch’ na Kòrsou a indiká. ‘Jay Stax a hasi tur posibel pa gana, pero nos ta orguyoso tambe di e otro 8 dj-nan ku tabatin e kurashi pa partisipá den e kompetensia, Kòrsou ta karga ku dj-nan talentoso’, asina Egon a terminá bisando.
‘The Flying Dutch Curaçao’ ta tuma lugá djaweps awor, 25 di òktober, riba e lugá di parker di Mambo Blvd. i ta kuminsá for di 6 or di atardi i terminá 1’or di mardugá. Armin van Buuren pa promé biaha lo duna un presentashon aki na Kòrsou huntu ku Sunnery James & Ryan Marciano, Lucas & Steve, Sevn Alias, Jeon i Menasa. Karchinan general i VIP Standing ta optenibel via www.theflyingdutchcuracao.com i tambe via di e puntonan di benta konosí: 24 uur uit de muur, Van den Tweel Zeelandia, Mensing’s Caminada, Miles Jazz Cafe, Bruna, Bottles, Madero Lifestyle Store i Funmiles.