WILLEMSTAD.- Pa promé biaha despues di 6 aña ku e lista di e artistanan di Hip Hop mas riku na mundu ta keda liderá pa un otro persona ku no ta Sean ‘Diddy’ Combs. Segun e revista Forbes, Jay-Z ta para awó na e promé puesto.
Segun e revista Forbes ta kalkulá e kapital di Jay-Z na 900 mion dòler. Aña pasá ainda e kasá di Beyonce tabata para na e di dos lugá, e tempu ei ku un kapital balorá na 810 mion dòler.
E revista ta informá ku e kapital di Jay-Z a krese a base ku e champaña i cognac ku e artista a pone riba merkado a subi di balor. E balor di e kas diskero ‘Roc Nation’ i e servisio di ‘streaming’ tidal tambe a subi di balor.
Diddy ku ta na di dos lugá su kapital ta keda kalkulá na mas o ménos 825 mion dòler. Na di tres lugá tin Dr. Dre ku 770 mion dòler.
E tòp tres di artistanan mas riku den e género di Hip Hop ta alabes esnan ku tin mas kapital den henter e industria musikal.
Drake i Eminem ta sera e tòp 5, segun Forbes nan kada un tin un kapital di 100 mion dòler.