NEW YORK, MERKA.- Jay Z a bisa ku el a yora di alegria ora su mama a papia habrí kuné i bisé ku e ta lesbiana.
Den e edishon di mañan, 6 di aprel 2018, di e programa: ‘My next guest needs no introduction’ ku David Letterman riba Netflix, e magnate di rap a bisa ku e ta felis ku su mama ta liber.
Jay Z a bisa ku e tabata sa ku su mama ta gay, pero ku ocho luna pasá ta promé biaha ku nan a papia riba e tema. El a bisa ku su mama mester a fingi loke e no tabata, pasó e no kier a pone su yunan pasa bèrgwensa.
Gloria Carter a sali for di kashi den e kansion di Jay Z di 2017 titulá ‘Smile’, ku ta inkluí e poema: ‘Livin in the Shadows’.