WILLEMSTAD.- Den Latin Grammy ‘Despacito’ a logra di optené kuater galardon i awor den Grammy Awards e ta bai kompetí pa tres galardon den e kategorianan mas prinsipal.
E ‘mega éksito’ di Luis Fonsi i Daddy Yankee su vershon remix ku Justin Bieber a optené ayera tres nominashon, pa grabashon di aña, kansion di aña i mihó interpretashon pop pa duo o grupo.
Pa grabashon di aña ‘Despacito’ ta kompetí ku ‘The Story of O.J.’ di Jay-z, ‘24K Magic’ di Bruno Mars, ‘Humble’ di Kendrick Lamar i ‘Redbone’ di Childish Gambino.
Pa kansion di aña, un premio pa e kompositornan, e ta kompetí ku ‘That’s What I Like’ di Mars, “4:44’ di Jay-Z, ‘1-800-273-8255’ di Logic i ‘Issues’ di Julia Michaels.
Fonsi a ekspresá su mes riba Instagram indikando ‘Den e tempunan tumultoso den kua nos ta biba, kaminda divishon ta abundá, mi ta mas ku felis i orguyoso ku un kansion na Spañó ta nominá den tres kategoria prinsipal. Ban sigui kompartí nos kultura i rais ku Mundu. No tin mihó momentu ku awor. Biba e Latinonan i nos músika’.
Jay-Z ta enkabesá e lista di kandidatonan ku 8 nominashon, sigui pa Lamar ku 7 i Mars ku 6 nominashon.