WILLEMSTAD.- 23 di yüni 2018 tabata fecha ku Foundation Jazz Meets Cultures a organisá e di dos edishon di Jazz Meets Cultures  ku e meta pa rekoudá fondo pa por yuda nos hóbennan ku desaroyo di nan talento den músika i baile.
Ayera djaluna 10  di desèmber, e fundashon a tene un konferensia di prensa, den kua el a duna informashon di e hóbennan entre 8 pa 14 aña ku lo bai haña lès di músika serka maestro Dennis Aalse bou di patrosinio di ‘Foundation Jazz Meets Cultures’.
Den kuadro di kombatimentu di pobresa Gobièrnu di Kòrsou a traha un “Urgentieprogramma” pa mehorá kalidat di bida den barionan i a skohe 4 bario di enfoke, Barber, Buena Vista, Montaña i Otrabanda, pa pone atenshon na dje. Un di e temanan di atenshon di e programa aki ta edukashon i formashon, hustamente loke ku FJMC ke kontribuí na dje.
For di e 4 barionan, FJMC a reklutá 8 hóben di kua e selekshon di 2 hóben pa bario aki a keda hasí huntu ku e kordinadónan di e respektivo barionan: Otrabanda - Guiselle Giterson; Buena Vista - Jonathan Plantijn; Barber - Siegfried Hazel i Montaña - Shadianara Bitorina.
E 8 hóbennan ku a keda reklutá, ta: Bario di Otrabanda: Melani Schrijver (12 aña)  & Rosheydion Lacrus (9 aña); Bario di Buena Vista: Malverick Ortela (13 aña) & Mariviene Ortela (8 aña); Bario di Barber: Estefanie Cannister (12 aña) & Faruently Roojer (13 aña) i Bario di Montaña: Mishelen Hersisia (14 aña) & Bre-shaina Ruiz (13 aña).
E proyekto aki ta e promé ku FJMC ta presentá den un seri di mas kurso ku lo kontinuá segun ku ta generá fondonan.
Kuminsá reservá 1e di yüni 2019 pa e di tres edishon di Jazz Meets Cultures i keda pendiente pa anunsio di tantu artistanan komo e sitio di e edishon aki.
Pa bo keda na altura, kòrdá ‘like’ i bishitá e página di Facebook di FJMC, www.facebook.com /JazzMeetsCultures.