WILLEMSTAD.- Ku eksepshon di un dirigente, direktiva di Federashon Deporte Olímpiko Kòrsou (FDOK) ta regresá kompleto den ofisina pa próksimo dos añanan. Federashonnan di deporte miembro di FDOK ayera nochi a ekspresá nan konfiansa den direktiva di FDOK, enkabesá pa Jean Francisca.

E votashon pa presidensia di FDOK tabata pa eligí entre Francisca i Jurgen Faneyt, ku Francisca ganando ku votashon di 14-8. Pa e puesto di visepresidente, ku tambe ta un elekshon direkto, e votashon mester a bai entre aktual visepresidente Braafhart, Naisha SintJago i Ries van Lomwel kende a forma parti dje planchi di Faneyt. Pero Van Lomwel a retirá su kandidatura. Braafhard ta risibi 12 voto I Sint Jago 10. Mas despues a resultá ku hinter e plancha di Faneyt a bai retirada, evitando asina di keda rechasá pa reunion general.

Di e aktual direktiva, Rein Persaud (sekretario) no a risibí sufisiente voto i a pèrdè puesto den direktiva di FDOK. Di otro banda, Sophyene Merien (FEBEKO) ta risibí konfiansa di e federashonnan i ta un kara nobo den direktiva di FDOK.

Resumiendo, e plancha ku a keda presentá pa okupá ofisina di FDOK no a konta ku sosten di mayoria dje federashonnan.