Komo kampion di US Open huntu ku Horia Tecau

NEW YORK.- E tenista yu di Kòrsou Jean Julien Rojer a gana su di 3 torneo Grand Slam di tènis. Rojer huntu ku e rumano Horia Tecau ayera a vense e spañónan Feliciano i Marc Lopez 6-4 6-3 pa gana nan promé título U.S. Open doubles.

Pa e yu di Kòrsou ta su di tres título di Grand Slam. Anteriormente el a gana French Open (2014) den mixed-doubles i Wimbledon (2015).

Rojer/Tecau tabatin mester di 86 minüt pa gana dje duo spañó bou di un bon solo den Arthur Ashe Stadium.

Durante dje seremonia di entrega di trofeo, Rojer a referí na Kòrsou i a lamentá ku pa motibu di orkan no tabatin hende for di Kòrsou ku por a bula pa New York. Tambe el a trese dilanti ku e duo spañó kontra kua nan a hunga ta nan bon amigu. Pero ademas di esei, el a hasi un deklarashon ku a pone hopi wènkbrou bai laria.

Puntrá riba su suèter ku e tabatin bistí, koló gel i ku potrèt di Statue of Liberty, Jean Julien Rojer a duna di konosé ku el a keda inspirá pa e situashon ku a surgi luna pasá na Virginia i ku a laga un morto.

“E idea dje suèter a surgi despues dje insidente trágiko na Charlottesville i nos a bin ku e suèter pa promové pas i libertat”, segun e tenista a bisa.

“Mi tei aki (na Merka) for di tempu mi tabatin 12 aña, ta un dushi pais i mi ta kontentu ku a laga mi drenta i ku mi por traha aki. “Mi ta spera ku nos lo krea e tipo di oportunidat aki pa tur hende”, el a komentá.

“Mi ta sinti ku den tènis nos no ta papia hopi riba e kosnan aki. “Pero eifó nos ta atendé ku kosnan real di bida”.

Reakshonando riba e deklarashon hasí pa su kompañero, Tecau a bisa ku atletanan profeshonal mester ta liber pa duna nan opinion riba asuntunan ku tin di aber ku polítika.

Pa loke ta trata e spañónan, Feliciano Lopez a lamentá ku “nos no tabatin chèns kontra di nan ‘serve’. “Pero nos por ta orguyoso di a hunga final i mi ta mira ku nos tin hopi aña mas pa hunga huntu den dòbel”.

...Momento di wega ku Rojer reakshonando riba bala di nan kontrinkantenan...