AMSTERDAM.- Algun luna pasá Jemyma Betrian tabata mal batí ku un leshon hopi serio na un rudia. Pero e dianan aki e ta gana konfiansa ku por bai Weganan Olímpiko.
E momento di leshon ta algu ku awor aki, diesun luna despues, ketu bai ta trese sierto miedu serka e atleta. Tabata durante di un training na Turkia ku el a sker un kruisband i ku esei su soño Olímpiko di Tokyo 2020 a basha den otro. “Tabata algu asina kèns”, segun e atleta di 30 aña. “Mi tabata den training, mi ker a saka un moketa i a dal un paso den banda.... manera mi ta hasi shen biaha. Nunka algu a sosodé, e biaha’ki si”.
E kruisband den su rudia robes a sker. A start un trayekto largu di revalidashon miéntras ku kualifikashon Oropeo pa Weganan Olímpiko di yüli 2020 tabata andando. Te ora ku e pandemia di Corona a hasi su entrada i a forsa ku a posponé e Weganan.
“Ta puru suerte pa mi ku a posponé e weganan”, segun Betrian ta bisa. Despues di su kambio for di kickbox pa bòkseo kuater aña pasá, e Weganan di Tokyo a bira su meta grandi. “Mi no por a bai e promé torneo di klasifikashon olímpiko na Londres, pero tin un siguiente den yüni na Paris. Einan mi por partisipá.... si mi ta oké”.
E ‘Golden Girl’ ta tuma su tempu. ‘Mi ta hasi mi bèst, mi no a pèrdè ni un dia di revalidashon. Pero mi no ta pura e situashon. Ta mi deseo pa mi rudia rekuperá kompleto, ta trata di mi salú. Ku e pia ei mi mester sigui biba despues di mi karera”.
Den 2017 e atleta di Nijmegen a laga kickbox pa bòkseo. Na mas ku un okashon el a kue e título mundial Muay Thai. Pero netamente pa motibu di e hopi trabou ku su rudia den kickboxing, el a kambia pa bòkseo.
Den 2018 el a gana bròns den Kampionato Mundial di Bòkseo den kategoria te 57 kg.
“Siman pasá pa promé biaha m’a train 6x pa siman, pues kos ta mustra bon. Mi ta bek na Papendal ku e team hulandes. “NOC*NSF ta paga mi salario, pues mi no ta train riba mi mes. “Si mi logra e klasifikashon di Paris, lo mi ta gradisí na Dios. Pero si no t’asina, lo mi tin pas ku e situashon”, segun Jemyma a duna di konosé.