HULANDA.- Djasabra último a tuma lugá e presentashon ofisial di e kandidatanan pa ‘Miss Curaçao Holland 2022’, organisá pa Aubrey America Multitalented Productions.

Durante dje evento di presentashon ku a tuma lugá bou dje reglanan implementá na Hulanda en konekshon ku e situashon di COVID, e partisipantenan a presentá i kombersá p’asina por a sera konosí un tiki mas ku nan.

E públiko presente den e sala, konsistiendo di mayornan, partnernan i un gran parti di prensa antiano a disfrutá di un forma ameno dje presentashon.

Despues di e parti ofisial, tur kandidata a haña e oportunidat pa por a kombersá personalmente ku prensa bou di supervishon di presidente di hurado, sra. Saran Inderson. Na final prensa a skohe kandidata number 2, Jeny Minguel komo e ganadó di e título Miss Curaçao Holland Press 2022.

Dia 15 di desèmber próksimo lo kuminsá ku e votashon pa ‘Miss Internet’ i a anunsiá ku 5 di mart 2022 lo ta e fecha pa e sertámen final ku lo tuma lugá den Villa Thalia den kurason di Rotterdam.