LONDON.- Joycelline Jepkosgei di Kenia a gana e máratòn di London femenino ayera, miéntras Sisay Lemma di Etiopia a triunfá den e sekshon maskulino den organisashon di e promé evento kompletu for di e pandemia di Coronavirus. Brigid Kosgei kende tabata buskando pa bira e promé atleta femenino kende ta gana tres título konsekutivo di máratòn ingles for di despues di e aleman Katrin Doerre, a terminá na di kuater lugá. Jepkosgei a terminá ku su mihó tempu personal di dos ora, 17 minüt i 43 sekònde. Degitu Azimeraw di Etiopia a terminá na di dos lugá ku 2:17.58 sekònde i su kompatriota Ashete Bekere a finalisá di tres lugá ku un tempu di 2:18.18. Lemma di e otro un banda, no a logra gana e máratòn olímpiko na Hapon na ougùstùs pero a logra bòns bèk pa un viktoria den e kapital ingles den tempu di 2:04.41 sekònde. Máratòn di London a regresá bèk pa promé bes despues di 2019, ora ku el a keda wantá pa koredónan amatùr òf fanátikonan aña pasá di restrikshonnan di Coronavirus. E aktual kampeon di máratòn di New York Jepskosgei, a bai laga tur hende despues di un ora i 55 minüt, establesiendo un bentaha signifikante faltando algun mia mas pa bai. Mester apuntá ku tabata promé bes ku un kareda a keda kompletá pa koredónan femenino bou di un tempu di dos ora i 19 minüt.