WILLEMSTAD.- Agape Fire Ministries, den koperashon ku otro iglesianan, ta preparando pa organisá nan di dos evento evangéliko bou di nòmber “Jesus is Alive Festival 2019”. Esaki ta tuma lugá  riba Brionplein den Semana Santa, kuminsando djadumingu, 14  te ku 21 di aprel.
Meta di e Festival ta pa halsa e nòmber di nos Señor Kristu Hesus, spesialmente den e siman mas importante i santu di nos Fe Kristian, atraves di selebrashon di un evento evangéliko den e sentro spiritual di nos Isla Kòrsou.

E Festival ta konsistí di kuater parti: Feria di Artesania i Arte Kristian; Feria di Mucha i Hóbennan; Feria Médiko i di Salú i Festival di Evangelisashon i Adorashon.

E “Feria di Artesania i Arte Kristian” ta un feria kaminda henter e famia por bishitá pa kumpra tur tipo di artíkulonan di artesania i arte Kristian e.o: dekorashonnan, beibel, buki, T-shirt, etc. Esaki lo tuma lugá djasabra 20 i djadumingu 21 di aprel kuminsando for di 9 or di mainta te 5 or di atardi.

E “Feria di Mucha i Hóbennan” ta un feria ku weganan bíbliko, edukativo i kreativo. Lo tin weganan di “feria di ántes” i tambe bouncers. E muchanan lo tin oportunidat tambe pa eksperensiá e ministerio di e organisashon “Operations Christmas Child Curaçao” djasabra 20 di aprel 10 or pa 11 or mainta i djadumingu 21 di aprel 5 or pa 6 or atardi, na unda lo tin un fiesta pa muchanan entre 2 pa 14 aña. Durante e fiesta aki lo konta e muchanan tokante di Hesus i despues lo tin un sorpresa pa nan. Nos ta invitá tur nos muchanan i hóbennan di Kòrsou pa bin pasa un ratu dushi na e fiesta ku nos ta organisá pa nan.

E “Feria Médiko i di Salú” ta un feria kaminda personanan lo por haña un chekeo i diagnóstiko médiko  gratuitamente. Profeshonalnan lo duna tambe konsehonan di salú. Despues  lo tin oportunidat pa hasi orashon pa e personanan ku ke tambe. Esaki tambe ta tuma lugá djasabra 20 i djadumingu 21 di aprel 9 or mainta pa 5 or atardi.

E “Festival di Evangelisashon i Adorashon” ta e evento evangéliko ku lo tuma lugá tur dia durante e “Jesus is Alive Festival 2019” i lo konsistí di diferente aktividatnan e.o: alabansa i adorashon, baile, drama, pelíkula, evangelisashon i orashon personal. Predikadornan di diferente iglesianan lo trese e Palabra di Dios, i esaki ta  tuma lugá 14 pa 21 di aprel kuminsando 5 or pa 10 or di anochi.
Ta spera Kòrsou kompleto na e gran evento aki pa nos halsa nos Señor Kristu Hesus i disfrutá di un tremendo Semana Santa. Pa mas informashon por tuma kontakto via telefòn 670-4224 òf 675-2695.