MERKA.- E ròl ku Sylvester Stallone lo mester a protagonisá den un pelíkula nobo di Jackie Chan lo keda hasí awor pa John Cena.
Chan ku tambe ta produktor di e pelíkula kaminda e ta hunga e ròl di un eksperto di seguridat chines ku mester skapa algun trahadó for di un refineria na Irak despues ku esaki keda ataká.
Despues ku e tuma nota ku e kriminalnan ke hòrta un kantidat grandi di petroli e ta buska yudansa di e eks militar merikano, ku ta e ròl ku Cena lo protagonisá.
Aña pasá Chan a anunsiá ku Stallone lo ta esun kontratá pa e pelíkula. Lo el a bira e promé pelíkula kaminda e dos héroenan di akshon lo aparesé den mesun pelíkula. E motibu dikon a skrap Stallone no ta konosí.
E proyekto lo haña un nòmber nobo tambe, e nòmber bieu ‘Ex Baghdad’ ta for di mesa i ta pensando riba un título nobo. Grabashon dje produkshon sinematográfiko lo sigui bou dje nòmber ‘Project X’.