WILLEMSTAD.- Ayera nochi nos a risibí e informashon ku e konosido músiko, John James Willekes a fayesé na Colombia.
Konosí komo JJ Cool, e konosido saksofonista, John James Willekes, a studia músika na Universidat di Puerto Rico i tambe na Manhattan School of Music na New York.
Segun informashon ku ‘DEN E BEMBE’ a risibí ta indiká ku resientemente JJ Cool a biaha pa Bogota, Colombia riba indikashon médiko. Intervenshon médiko a tuma lugá pero ayera mardugá e músiko a fayesé.
‘JJ Cool’ huntu ku su kasa te ku resientemente via di nan fundashon DOJACMC tabata organisá regularmente riba Plaza JoJo Correa na Punda eventonan musikal durante di DMO su ‘Punda Vibes’. Forsa na famia i amigunan músiko. Ku John James sosegá na pas.