MERKA.- John Legend lo interpretá e ròl di ‘Jesus’ den e transmishon bibu dje obra ‘Jesus Christ Superstar’ ku lo keda pasá riba Pasku di Resurekshon via e kadena di televishon NBC.
Segun Robert Greenblatt, presidente di NBC Entertainment a bisa ku e echo ku John Legend lo tin e ròl prinsipal lo kambia e impreshon tradishonal ku tin di Jesus i lo bai mira esaki den un forma nobo.
‘Nos ta kontentu ku un músiko i produktor riba e nivel mundial di John Legend tin e ròl prinsipal di Jesus. E presentashon aki ta eksigí un kantante ku un alkanse haltu i un aktor ku un base profundo, no tin niun otro hende ku por hiba e historia na e públiko nobo’, asina Greenblatt a terminá bisando.
‘Jesus Christ Superstar’ ta basa riba un musikal di Broadway di 1971, den kua e último siman di bida di Jesus ta e punto sentral dje obra. For di 1973 e aktor i kantante Ted Neeley ta interpretá ròl prinsipal den diferente presentashon dje musikal.