MIAMI.- Porta hopi hende no a para ketu pero e segunda base di Baltimore Orioles, Jonathan Schoop, a registrá diferente kos komo esun promé den e Weganan di tur Strea ayera. En general Schoop tabatin un tremendo partido kaminda el a sa di bai di 1-1 den e partido i tambe a realisá tur su hugadanan defensivamente.

Laga nos bai bèk pa tur e kosnan ku Jonathan a realisá komo promé. El a aparesé den su promé weganan di tur strea i tabata e promé hungadó ku a keda introdusí. Tambe den su promé turno na bate el a konektá un doblete kual tabata e promé èkstra base di e partido. Por último el a anotá tambe riba hit di e tersera base di Minnesota Twins kende ta Miguel Sanó.

E kareda aki naturalmente tabata e promé kareda di e partido. Schoop sigur a disfrutá di su promé aparishon den All Star Game i a selebrá esaki den gran forma.