WILLEMSTAD.- Un temporada di trabou duru den infield di Detroit Tigers, a habri kaminda pa Jonathan Schoop por figurá komo kandidato pa gana Wante di Oro. Ayera MLB a publiká e lista di kandidatonan kendenan den American League a haña sufisiente punto pa figurá komo kandidato pa risibí e distinshon. Pa tur posishon, ku eksepshon di 2da base, tin tres kandidato.
Jonathan Schoop, komo 2da base di Detroit Tigers, ta kandidato huntu ku Cesar Hernandez (Indians), Nicky Lopez (Royals) i Denny Mendick (Tigers).
Ningun dje kuater kandidatonan aki pa Wante di Oro pa 2da base den Liga Amerikana no a yega di gana e premio. Lopez ta komandá hungadónan di 2da base den AL ku ocho Defensiva Runs Saved, miéntras ku Hernandez a finalisá ku seis DRS i Mendick tambe a figurá ounke el a hunga muchu ménos inning. Miéntras ku Lopez a mira akshon den 424 inning, Hernandez a hunga 503 entrada i Schoop 355.2. Mendick a aparesé den solamente 226 inning den 33 partido.
Di su parti, e yu di Kòrsou Schoop a finalisá ku +2 Outs Above Averahe den su temporada di debut ku Detroit.
Schoop a mira akshon den 44 wega, e tabatin 60 Put Out, 133 Assists, 1 eror, a partisipá den 25 doubleplay i a kaba ku averahe di fildeo di .994.
Dia 3 di novèmber próksimo lo anunsiá e ganadónan di Wante di Oro den Liga Amerikana.