Jong Holland Kampeon Liga MCB 2018

Kiper i alabes kapitan di Jong Holland, Julian Gaviria, ta risibi e kopa di kampion.

WILLEMSTAD.- A tuma su añanan pa finalmente e ekipo trikolor di Jong Holland porfin por bolbe yama su mes kampeon di Korsou. Jong Holland ayera nochi den Stadion Ergilio Hato a gana di Vesta ku skor mínimo di 1-0 pa koroná un kampeonato di kua por bisa nan a kore “punta punta”. Esei ta nifiká ku for di inisio nan tabata na promé puesto i ta bin klousurá e kampeonato na e puesto di honor.

Pa Vesta tambe por bisa ku nan a finalisá na e di dos puesto despues di pasa gran parti dje kampeonato komo number dos.

Kampeonato Liga MCB 2018 a keda dediká na Frits Meursing, Egon “Catoto” Schoop, Hubert “Be” Braafhart, Humphrey “Nacho” Ignasio i Donald “Dona” Seferina”.

Gol trempan

Despues ku tur hende a bai sirkulo sentral pa promé sake di bala ku a keda efektuá pa minister di Deporte, Enseñansa Siensia i Kultura señora Marilyn Alcala Walle, árbitro Junil Adelina a pita pa bala lora. Mesora e ekipo di Vesta a Sali pone preshon riba e defensa di Jong Holland, poniendo ku esakinan a manda e bala kòrner. Sinembargo, na di 6 minüt riba un atake di Jong Holland riba banda robes di tereno Jurensley Martina ta kue e bala drenta kuné i trata na krusa e bala mei mei. E kueru ta dal na man di Gerson Sambo, defensa di Vesta nèt na rant di e aria penal. Rèfri Adelina mesora a flùit penalty pa Jong Holland. Hugo Acosta Perez a kobra esaki perfekto mandando Jong Holland ariba 1-0. Vesta a purba di tur manera pa yega na e gol di empate pero haftaim a yega 1-0.

Den di dos mitar Vesta a hunga muchu mas mihó ainda ku algun kombinashon nechi pero no por a anotá. Kasi por bisa ku Vesta tabata di malu den e wega aki, paso un bala ku tur hende ya a kanta gol kaba tirá pa Mirco Colina jr ta dal den palu di gol i sali afó. Otro tiru di Rushendro Kirindongo ta keda desviá pa e kiper di Jong Holland Julian Caviria. Jong Holland tambe a haña oportunidat pa skor su di dos gol, pero Randal Winklaar ta dal e bala na kurpa di kiper di Vesta.

E wega ta bin kaba 1-0, di manera ku selebrashon por a start serka e ekipo trikolor.

Kapitan di Vesta Etherlbert Daal, ta risibi e kopa di sup kampion for di man di Minister Hensley Koeiman.

 

Selebrashon serka hungadónan di Jong Holland despues ku a skor riba tiru penal.

 

Akshon durante dje partido final di Liga MCB 2017/2018.

SHARE

LEAVE A REPLY