Jong Holland ku stap grandi a drenta semi final

Deporte

Caribbean Club Shield

WILLEMSTAD.- E ekipo di Jong Holland ayera nochi a hunga un tremendo futbòl i a pasa fásil riba Club Sportif Moulien, di Guadeloupe, ku skor di 3-0 pa gana su ticket pa semi final di Caribbean Club Shield. Jong Holland ayera nochi a hunga sendé sendé, manera hóbennan ta bisa, i a logra e viktoria ku hinter e pueblo di Kòrsou tabata deseá.

Jong Holland kontrali na loke nan a hunga den nan promé dos weganan, ayera si a ataká Club Sportif Moulien hopi feros i a krea diferente chèns di anotá gol kontra di e ekipo di Guadeloupe.

Jong Holland ya na di 15 minüt ta pika dilanti 1-0 ku un tremendo golaso di Gersinio Constansia ku segun e weganan ta avansando, ta hungando kada dia mihó. Tabata riba un kombinashon di Zinho i Chali Martina ku Zinho Constansia ta lòs un fòsil ku e kiper di Sportif Moulien Kevin Ajax a para mira kon e bala ta pasa ku un furia bai den nèt sin ku e por a hasi nada. Despues djei e wega a bira muchu mas movibel ku tur dos ekipo atakando otro. Sinembargo nan no a logra anotá gol i e wega ta yega haftaim ku Jong Holland dilanti 1-0.

Den e komplementario Jong Holland ta amplia nan bentaha na di 55 minüt ku un bunita gol di Siebren Hoekstra riba un kruse di Ruensley Leuteria. E wega e ora ei a bira 2-0. Djei e ekipo di Club Sportif Moulien a disidí na lucha pa empatá e wega pero Julian Gaviria, kiper di Jong Holland, a impedí esaki na sigur tres okashon.

Ora ku e wega a yega den e minütnan final ku Club Sportif Moulien atakando Jong Holland i buskando pa kòrta e bentaha, tabata Jong Holland ku ta sali di kontra gòlpi i ku kuater pase ta yega na e gol di Sportif Moulien. Bryan Anastasia ta duna Charles Martina riba medio kampo, Charles ta abilitá Ruensley Leuteria kende ta krusa e bala pariba pa Siebren Hoekstra kore drenta i tek e bala den gol pa hasi e wega 3-0. Akinan Jong Holland a buta e wega riba eis.

Faltando 2 minüt pa e wega finalisá e hungadó Dylan Mixtur ta risibí un karchi kòrá serka e rèfri Charvis Delsol paso e la ranka Leuteria na kabei benta abou. Jong Holland ku e viktoria di ayera ta pasa pa semi final djasabra awor 8 or den stadion Ergilio Hato kontra di Club Franciscain di Martinique.