WILLEMSTAD.- Fundashon Margarita ayera tardi a anunsiá un grandioso konsierto pa Dia di Mama titulá ‘Juan Gabriel Vive’ ku aktuashon di un gran artista i intérprete, ku un bos elektrisante i masha famoso internashonalmente, Ricardo de Castro.
Ricardo de Castro tin e bos outéntiko di Juan Gabriel i asta e personalidat ta igual di esun di e ya fayesido Juan Gabriel. Bo ta sera bo wowo i imaginá bu Juan Gabriel riba tarima.
E konsierto riba Dia di Mama, 13 di mei ta tuma lugá den sala di eksibishon di WTC i ta kuminsá pa 7’or di anochi.
E presentashon di Ricardo de Castro lo tin un durashon di 2 ora i mei i e lo wòrdu kompañá pa su Mariachi ku ta konsistí di 16 músiko ku lo bin for di Colombia. Lo tin kompañamentu tambe di un orkesta ku lo kombiná ku e Mariachi ku lo pèrkurá pa hinka bu totalmente den e ambiente di músika di Juan Gabriel.
Durante dje anochi Ricardo de Castro lo interpretá un kansion na papiamentu i tambe algun kansion na portugues, spesialmente pa e kolonia portugues residensiá na Kòrsou.
Tur mama ku yega tempran lo tin e oportunidat pa saka potrèt ku Ricardo na entrada di WTC, esaki kontra di un pago chikí pa e potrèt.
Artistanan lokal ku lo presentá durante dje anochi ta Mariachi Fortuna, Mariachi Solis i e gran ídolo Eldridson ‘El Genio’ Eugenia. Pa tur invitado por hari nan barika yen, lo tin aktuashon spesial di e popularísimo, Cynthia Martina.
Karchi pa ‘Juan Gabriel Vive’ ta optenibel na 24 uur uit de Muur, Mensing’s Caminada, Tik Tak, van der Tweel Supermarket, FunMiles i na Mangusa Hypermarket.