WILLEMSTAD.- Relashoná ku e artíkulo ku ‘DEN E BEMBE’ a publiká ayera bou dje título ‘Karnaval 2020 ta tras di lomba, kiko awó?’, nos a risibí invitashon di Fundashon JAG pa un kombersashon pa nan por aklará algun ponensia ku a keda presentá den e artíkulo.
Juni Aniceta, presidente di Fundashon JAG a indiká ku durante di temporada di Karnaval e tabata di focus pa tur kos kana bon i ku kualke kritiká òf insinuashon ku tabatin e no a reakshoná riba esakinan pa e no kita for dje focus pa brinda Kòrsou un tremendo Karnaval.
‘Awor mi tin tempu pa nan’, asina Juni a kuminsá bisando, indikando ku temporada di Karnaval ta tras di lomba i awor e tin tempu pa kontrarestá kualke kritiká ku lo por tin.
‘Na promé lugá mi ke enfatisá ku den e direktiva di Fundashon JAG no tin niun problema. Problema a surgi ku tersera persona ku ta keda kontratá pa Fundashon JAG pa hasi sierto labornan. Na momentu ku nos a tuma nota dje problema, mesora nos a tuma medida i kibra e relashon ku e personanan’.
Demostrando ku e organisashon debidamente a hasi entrega di nan relato anual na Sektor di Kultura i komo prueba a mustra ‘DEN E BEMBE’ e dokumento ofisial, Juni a splika ku na inisio dje temporada tabatin insinuashon ku lo no a entrega e relato, pero a resultá ku si a hasi esaki i ku e organisashon tin prueba ku e dokumento a keda entrega, pero na sektor di Kultura nan a pèrdè e ‘hard copy’, loke despues a bolbe wòrdu entrega.
E ta lamentá ku e informashon eróneo aki a keda publiká paso enberdat e ta trese deskonfiansa den e organisashon. Fundashon JAG ta finansieramente stabil i esnan enkargá ku e maneho finansiero debidamente ta sòru di hiba un maneho estrikto i na òrdu. Prueba di esaki ta e saldo positivo ku un biaha mas e organisashon tin te na e momentunan aki ku praktikamente tur gastunan organisatorio di Karnaval 2020 paga.
No por tin niun duda riba e uso di supsidio, paso Gobièrnu ta risibí e relato finansiero ku ta deskribí e uso di e supsidio ku Gobièrnu ta entrega.
Relashoná ku kehonan ku tabatin di parti di Reina 2019 i tambe Pancho 2019 riba retnan sosial, Juni a indiká ku te ainda e ta wardando pa e bòm bula. ‘Nos a kumpli kabalmente ku nos embahador. Nan momentu ku nan keda eligí nan ta drenta un akuerdo ku Digicel ku ta spònser e embahadornan di Karnaval. E kontrato entre e Reina, Prens i Pancho ku Digicel ta algu ku Fundashon JAG no ta forma parti di dje. Pa sustansia ku a kumpli ku e embahadornan di 2019, Juni a tuma kontakto ku representante di Digicel ku di su banda a konfirmá ku a kumpli ku tur loke a keda stipulá den e kontrakt.
E insinuashon ku tabatin kònkelmentu ku resultado di elekshon di Reina, Prens i Pancho tambe a keda refutá i e informashon ku e kontadó di puntuashon lo mester a hasi kambio a keda desmentí enérgikamente.
‘DEN E BEMBE’ a haña e oportunidat tambe pa hasi algun pregunta relashoná ku alegashonnan personal ku a keda hasi kontra di Juni relashoná ku entre otro outo ku a ser kumpra i e presidente di Fundashon JAG a presentá dokumentonan ku ta indiká ku di forma ofisial i via di instansia finansiero ela kumpra su outo i bou di niun sirkunstansia a hasi uso di entradanan di Fundashon JAG òf supsidio di Gobièrnu pa e yega na su outo.
Finalmente nos por konkluí i a indiká esaki tambe na e organisashon i nan a aseptá tambe ku a laga muchu komentario negativo keda sirkulá sin ku e organisashon ta sali i desbaratá e alegashonnan. Manera nos a indiká Juni a bisa di kier a keda di focus i awor e ta kla pa atendé ku tur hende ku tin un òf otro reklamo.