WILLEMSTAD.- Ayera tardi Fundashon JAG a organisá un rueda di prensa kaminda di forma ofisial a presentá e kalènder di aktividatnan pa loke ta trata temporada di Karnaval 2019.
Den su diskurso, Juni Aniceta, presidente di Fundashon JAG, organisadó di aktividatnan relashoná ku Karnaval 2019 a indiká ku JAG a traha i tei sigui traha pa logra pa Karnaval di Kòrsou haña rekonosementu internashonal. ‘Mester logra ku nos ta atraé mas turista pa Karnaval, mester sigui inová i sòru pa entre yanüari i mart 2019 Kòrsou ta ‘The Place to Be’. Na final di su diskurso Juni a pidi pa ‘Ban engrandesé Karnaval di Kòrsou’.

Apertura ofisial
Apertura ofisial di temporada di Karnaval ta tuma lugá riba djabièrnè, 4 di yanüari ku un ‘jump up’ spesial pa gruponan hubenil. E jump up lo sali for di Plasa Hariri i lo terminá na Sambil. Ta e intenshon pa gruponan hubenil partisipá ku nan trahe ku a yega di wòrdu presentá.

Apertura Carnival Village
Riba djasabra 5 di yanüari lo tin Apertura di Carnival Village. Pa esaki a organisá un konsierto ku inisialmente lo mester a tuma lugá riba Kleine Werf, pero sitio dje konsierto ku lo konta ku presentashon di Kassav, Icons by Gio i Gentz ta tuma lugá awó den Stadion di Rif. Meta dje konsierto aki ta pa logra rekoudá fondo pa dje forma ei por komplementá e gastunan ku tin pa organisá Karnaval.
Juni Aniceta a gradisí Fundashon Bon Intenshon, Mocky Job i Fundashon KJ-74 ku a duna nan aporte pa realisá e tremendo konsierto.
Karchinan pa e konsierto próksimamente lo ta na benta na puntonan di benta konosí.

Selebrashon 50 aña Karnaval Bándabou
Karnaval di Bándabou den 2019 tei selebrá su di 50 aniversario i riba 6 di yanüari lo tin apertura di nan temporada di Karnaval. Nan lo tin un kantidat di aktividat riba e kalènder di Karnaval 2019 i e Marcha di Skol di Bándabou ta e ‘highlight’ huntu ku Marcha di Bándabou.

Festival di Tumba Hubenil
Festival di Tumba Hubenil 2019 lo tuma lugá riba un otro dia manera ta kustumber. E biaha aki e festival lo no tuma lugá riba e djadumingu despues di Festival di Tumba, pero lo tuma lugá riba djasabra 19 di yanüari 2019. E bandanan ku lo tin na nan enkargo pa kompañá e tumberonan hubenil lo ta Hype, YMG i Dolce.
E kalènder di aktividatnan di Karnaval 2019 lo aparesé huntu ku e artíkulo aki riba www.extra-v2.mystagingwebsite.com