WILLEMSTAD.- Hubert “Juni” Aniceta Jr. i su Fundashon JAG (Juni Aniceta i Grupo) ta na kabes di Karnaval 2018, i posiblemente 2019 despues di evaluashon ta loke ku minister di enseñansa a duna di konosé. Sr. Aniceta ta un dje grandinan di nos kultura i spesialmente Karnaval.

Den deklarashon pa EXTRA sr. Aniceta  a bisa ku ta un plaser pa duna aporte na Karnaval di Kòrsou. E ta trahando pa hopi aña pa kultura di Kòrsou. Awor el a haña e oportunidat p’asina por duna su aporte pa engrandese Karnaval di Kòrsou.

“Kòrsou kompleto por spera ku despues di tantu problema, ku awor e parti di kreatividat ta bai resaltá den Karnaval. Tambe nos ta para pa duna balor na hende”, segun sr. Aniceta.

E ta kere ku konhuntamente ku AGKK (Asosashon di gruponan di Karnaval) esta e gruponan di Karnaval kendenan ta e protagonistanan di Karnaval, ta bai sinta papia i pa sinti nan dolónan p’asina nos por tin un dushi Karnaval sin problema.

Kuantu e presupuesto ta, sr. Aniceta no por a bisa, pasobra ta ayera e desishon a kai ku e ta organisá Karnaval e aña aki. El a bisa EXTRA ku ainda e tin di sinta ku gobièrnu i tambe sektor di kultura, i aki lo trese dilanti bon kla e problemanan di Karnaval.

Sr. Aniceta a bisa ku nan tim a probá for di 2013 ku ta traha abase di kreatividat, kaminda no mester duna terseranan elekshonnan pa organisá. Fundashon JAG hasta a kuminsá ku elekshonnan di bario di pariba i aki gobièrnu mes a skapa hopi sèn. Na 2013 grupo JAG a hasi tur elekshon huntu ku AGKK.

For di 2015 nan grupo ta enkargá ku elekshonnan na nivel haltu pa barionan di pariba i e aña aki huntu ku AGKK a hasi elekshon Prens i Pancho grandi. Ya kaba aki tin bahada di gastu, di akuerdo ku sr. Aniceta. Den tur e elekshonnan kreatividat a hunga un ròl pa ku e gastunan.

Sr. Aniceta ta kere firmemente den partisipashon fuerte di spònsernan pa baha e preshon riba e presupuesto ku gobièrnu ta duna nan. Su deseo ta pa komersio adoptá un òf mas grupo di Karnaval pa yuda engrandes’e nos Karnaval.

Apesar ku e tempu ta kòrtiku pa ku organisashon di Karnaval, sr. Aniceta ta bai aserká skolnan pa mira si por engrandes’e tantu gruponan hubenil komo di tiner. E ta kere ku serka e gruponan aki kreatividat ta hunga un ròl grandi riba nan presupuesto.

“Skolnan tin diferente parada i esaki ta hopi bon idea pa motivá e muchanan i laga skolnan kuminsá partisipá manera ántes. Si mi a haña e notisia aki mas tempran lo mi a hasi workshop ku skolnan pa nan ta mas kreativo”.

Sr. Aniceta a indiká tambe ku asina e kaba di sinta ku gobièrnu e ta habri inskripshon pa tur aktividatnan di Karnaval.

Apesar ku e tempu ta kòrtiku, sr. Aniceta sa ku e por traha un bon trabou i kita problemanan ku tin rondó di Karnaval, kual situashon ta demotivá hende pa partisipá.

Otro aña ta bai duna balor na hende. “Nos organisashon semper ta homenahiá òf rekonosé hende. Mayoria hende ku traha patras di kortina di Karnaval manera e diseñadó, entrenadónan i hendenan ku ta duna aporte i no ta bin dilanti. Mester kuminsá duna balor na grupo di Karnaval”, sr. Aniceto a indiká finalmente.