WILLEMSTAD.- Fo’i momentu ku e flyer a subi e página di facebook di Juni Juliet kaminda por a mira Juni Juliet huntu ku Mr. Saab, Ñaño Rosario i Ompi Stefania bo por a premirá ku e konsepto aki lo bai bira algu ku tei hala hopi atenshon i dicho echo. Djasabra fo’i tempran públiko a yena tur huki di e terasa di Riffort Village pendiente pa 8’or di anochi e presentashon di Juni Juliet & The Legends. Na momentu ku e presentashon a kuminsá ku introdukshon dje músikonan bo por a sinti kaba e entusiasmo i aseptashon dje konsepto musikal. Pa Juni Juliet tabata un honor pa a presentá huntu ku su leyendanan ku fo’i chikí a disfrutá di nan músika i e komposishonnan di Doble R. Tres set ta loke ku a keda presentá i kaminda e públiko a kuminsá baila den tur skina di Riffort Village for di e promé piesa te e último. Un públiko ku na nan reakshon bo ta ripará ku nan a biba un anochi inolvidabel, rekordando ‘ten nan ten’. Ata ora ‘Ta Muhé ta manda Mundu’ a zona, e damanan presente a kanta mané ulandesnan sa bisa ‘uit volle borst’ huntu ku e kantantenan. ‘Juni Juliet’ i ‘The Legends’ tremendo te bai!. Riba foto nos ta mira algun imágen durante dje presentashon. Riba e wèpsait di EXTRA lo bo tin oportunidat di tuma nota di mas potrèt dje tremendo aktividat aki.