WILLEMSTAD.- Próksimamente pueblo di Kòrsou lo tin e oportunidat di disfrutá dje presentashon di kuater di su leyendanan musikal huntu riba un tarima.
Ayera ‘DEN E BEMBE’ a tuma nota dje promé di un serie di ensayo ku lo bai tuma lugá pa e proyekto musikal ‘Juni & The Legends’.
Manera ‘DEN E BEMBE’ a publiká siman pasá djabièrnè, Juni Juliet, Mr. Saab, Ompi Stefania i Ñaño Rosario a uni pa forma ‘Juni & The Legends’.
Den kombersashon ku Juni Juliet el a indiká ku siendo un artista ku tin mas ku 40 aña aktivo, trahando hopi den eksterior e ta mira proyektonan musikal manera Buena Vista Social Club i no ta mira pakiko nos baluartenan tin di stòp di kanta.
‘Pa mi toka Juan Luis Guerra of Wilfrido Vargas, mi ta preferá toka un konsepto ku komposishonnan di Doble R. Doble ta un Mozart kurasoleño, un kompositor i areglista ku ta tene kuenta ku tur aspekto di su komposishon i areglo. Areglonan ta ‘puntjes op de i’.
Ku e konsepto aki tin yen djaka bieu huntu. E bon ta ku tur hende ta entusiasma ku e proyekto. Ta despues di hopi aña ku Mr. Saab i Ompi tei kanta huntu, loke pa Mr. Saab a lanta hopi nostalgia i pa ami e kos ei ta e kos!. E repertorio lo inkluí kantikanan di Doble R ku mi ta gusta kombiná ku algun kansion di Ompi ku ENOS, par di bolero ku Ñaño i naturalmente algun kansion ku ami mes ta presentá. Un medley di tumba lo no por hasi falta, nos ta trahando riba un medley di tumba di Ompi i Mr. Saab”, asina Juni Juliet a deklará na ‘DEN E BEMBE’.

RIFFORT
Estreno di ‘Juni & The Legends’ lo tuma lugá dia 28 di yüli próksimo na Riffort Village. Lo e ta un presentashon grátis pa pueblo di Kòrsou ku lo kuminsá pa 8’or di anochi i terminá 11’or di anochi. Públiko lo haña e oportunidat pa sera konosí ku e konsepto riba e anochi aki.