WILLEMSTAD.- Despues di por a disfrutá di e último kompaktonan "Deklará bo Bendishon" i “AGAPE”. Awor ta toka turno na otro bunita produkshon titulá “Mi ta lanta”. Esaki ta un kansion di enkurashamentu ku próksimamente lo profilá riba e produkshon nobo di e konosido kantante, Junior Anzola. Despues di a kosechá tremendo éksito ku su último grabashonnan ku kansionnan manera entre otro; "Bo konosé mi kurason, Kap'e i Violin", Alaba, Deklará bo Bendishon, Saminámi, Agape etc., etc., awor ta toka turno na otro repertorio di kansion nobo ku ta pendiente pa enrikesé farándula kristian ku últimamente konosé un kresementu enorme na aseptashon den nos komunidat. Atrobe un variedat notabel di ritmo, melodia i areglo ku lo asentuá e estilo úniko di interpretá ku ta karakterisá e tremendo kantante aki. E produkshon aki ku lo trese mensahenan inspiratívo ku lo alegrá i enkurashá kada persona ku ta gusta nos tremendo produkshonnan lokal. E kansionnan ku ta figurá riba e kompakto aki ta kla pa kuminsá zona na emisoranan en espera di lansamentu ofisial di e produkshon. Pues keda pendiente pasobra pronto e disko kompakto nobo di Junior Anzola lo ta optenibel. Ku esaki nos ta deklará ku maske kon e situashon ku nos por ta aden ta, “nos ta lanta” den e nòmber di Hesus.