WILLEMSTAD.- Djasabra dia dos di sèptèmber amantenan di reggae por disfrutá atrobe di un konsierto "Tribute 2 Bob Marley" di e banda super popular Rootsriders huntu ku nos propio yu di tera Junior Tecla. Integrantenan di Rootriders ta interumpí nan gira di festivalnan na Europa pa sorprendí Kòrsou i Boneiru ku un konsierto.
Ta konsiderá Rootsriders komo e mihó banda di tributo na e leyenda di reggae Bob Marley. E banda a lanta na aña 2006 na okashon di e di 25 aña di fayesimentu di Marley.
Awe na aña 2017 Rootsriders ta mas popular ku nunka. E ta duna tantu na Ulanda komo leu pafó di Ulanda presentashonnan sumamente gustá i bon bishitá. Ningun konsierto ta idéntiko ya ku Rootsriders ta renobá su show i repertorio konstantemente.
Ya ta hasi dos aña ku Rootsriders a duna su último konsierto riba nos isla. Pa músikonan di Rootsriders, Kòrsou ta un di e lugánan mas bunita, dushi i yen di ambiente kaminda nan gusta presentá.
E kantante i kompositor Junior Tecla ta e vokalista prinsipal ku ta kanta e piesanan klásiko di reggae asina konvisente, kasi manera Bob Marley mes. Junior: "E por ta zona straño pero ora mi subi podio, mi ta sinti Bob. Mi ta bira un ku su mensahe i su letranan. Pa aworakí mi ta sumamente kontentu ku e konsiertonan di Rootsriders den Karibe, huntu ku mi prima e kantante, Tamara Nivillac ku tambe ta un integrante di Rootsrider.”
Pre-show di e konsierto ta Vibenation huntu ku Naomie Silvanie i e rapper ZOINX.
Karchi ta optinibel na: 24 uur uit de muur, Van den Tweel, Beep Beep, Bruna, Mensing’s i Madero Ocean Club.