WILLEMSTAD.- Despues di un tempu di ta ‘cover’ ku diferente kantante Jurgen Lacruz a krea un komunidat riba su página di facebook, kual hopi hende a kuminsá siguié pa e manera spontáneo ku e ta pone kantantenan den spòtlait.
For di e grabashon i ‘post’ di videonan tin algun video ku a risibí mas ku 20 mil ‘views’ i otronan ku te hasta a yega 70 mil ‘views’.
Jurgen ademas di músika ta eduká pueblo ku informashon balioso di kuido i hopi biaha ta pone mensahenan positivo riba su página di facebook. Hasta un biaha Jurgen huntu ku su amigu i siguidónan riba facebook a logra pa huntu kontribuí i paga un resibu di awa di un kas den nesesidat ku a keda kòrta.
Tur esakinan a pone bin na e idea pa organisá un konsierto titulá ‘Jurgen Lacruz & Friends Gospel Concert’.
Un konsierto di gospel di nos propio artistanan manera, Tania i Lintje Isenia, Liesje Lispier, Veanira Reed, Maudienne Espoza, Richards Engelhardt, Diveana Lopez, Reinier Lijfrock, Naomi Rogers, Rosell Francois, Ingerelli Francois, Harlianne Brazil, Deborah Gomez i Naomi Silvani ku tambe lo bai estrená un single.
Tur e kantantenan lo keda kompaña pa un banda bou di direkshon di Jurgen Lacruz.
Aparte di e konsierto lo bai tin mímika aktua i ku lus, algu sigur bunita pa bo mira.
E konsierto aki sigur no ta algu pa bo pèrdè.

FONDO
Fondonan ku keda rekoudá durante dje konsierto lo bai pa yuda famianan ku ta den nesesidat ku komestibel pa sigur un luna largu. Tur donashon tambe ta bon biní.

KARCHI
Karchinan ta optenibel na Mensing’s Caminada, Beep Beep Rio, Instracur na Dominguitoweg, na Betesda serka sra. Shirley Lacruz (Mama di Jurgen), ‘Nos Tienda’ na Hospital, serka Jurgen i tambe bo por yama 676-2754 òf app Arshel Begina na 675-4468 i lo e pèrkurá pa trese e karchi te kaminda bo ta.

...Veanira Reed i Liesje Lispier...