WILLEMSTAD.- Presensia di un dje mihó bateadónan pa Reino Ulandes den e promé buèlta di World Baseball Classic, Jurickson Profar, por ta na peliger pa e siguiente buèlta. Profar a leshoná un dede den un ‘sliding’ na tersera base den e partido kontra di Israel na momentu ku el a trata na alargá un doblete pa un tripel. El a keda saká out na tersera base i mesora despues di e hugada el a keda remplasá den tereno pa Sharlon “Wecho” Schoop.

E gerente general asistente di Texas Rangers, Mike Daly, a indiká ku e klup ta den kontakto ku e ortopedista ku ta trahando ku e selekshon di Reino Ulandes kende ta dr. Derek Papp di e organisashon di Baltimore Orioles. Ounke ku, segun informashon, e ekipo ta konfortabel ku e informashon ku nan a risibí tokante e leshon, t’asina ku Rangers por pidi Profar pa retirá for di e torneo i kue rumbo pa Merka.

E siguiente partido di selekshon Reino Ulandes lo ta djadumingu awor. Pues tin un algun dia pa e kuerpo médiko di e selekshon sigui trata e dede leshoná di Profar.

Despues di tres partido e hóben di 24 aña ta batiendo pa un averahe di .583 mediante seis hit den 11 turno ku dos doblete, un honron i tres kareda empuhá. E ta hungando centerfielder pa e selekshon ulandes i Andruw Jones a elogiá Profar durante konferensia di prensa kon tremendo atleta aki ta despues di a dun’é algun instrukshon pa ku e posishon di centerfield.