EL PASO.- Jurickson Profar tabata den akshon ayera un biaha mas pa El Paso Chihuahuas, ku ta sukursal di Tripel A di San Diego Padres. E pelotero yu di Kòrsou ayera a bai di 3-1 ku un honron i 4 kareda empuhá. Su honron tabata un di tres kareda den bòm di 6 inning miéntras el a empuhá un kareda tambe riba un flai di sakrifisio. E honron di ayera tabata e di dos den último dos weganan pa e pelotero YDK. Jurickson awor aki tin un promedio di 357 ku 2 honron i 8 kareda empuhá den kuater wega ku El Paso. Den tur su weganan te ainda pa El Paso Jurickson tabata promé bate. Miéntras ku dos di e weganan aki el a hunga su posishon kustumbrá di último tempu kual ta den leftfield. Miéntras e otro dosnan el a hunga na primera base, ku ta posishon ku el a hunga den Liga Grandi pa entre otro e propio ekipo di San Diego Padres.