SAN PEDRO DE MACORIS.- E pelotero yu di Kòrsou Jurickson Profar a yega na un akuerdo pa hunga den beisbòl invernal na República Dominicana (LIDOM) pa Estrellas Orientales. Esaki no ta promé biaha ku Profar ta bai hunga den LIDOM, mirando ku den su tempu komo prospekto di Texas Rangers el a hunga temporada 2012/2013 i 2013/2014 ku Tigres de Licey. Jurickson lo tin ku reportá awe na Estrellas Orientales, asina Manny Garcia gerente general di di e ekipo a anunsiá.  No ta konosí ainda ki dia ta plania pa e yu di Kòrsou hasi su debut pa Estrellas. Den e ekipo aki Jurickson Profar lo ta kompañero di entre otro Robinson Canó i tambe Yasiel Puig. Miéntras ku Jurickson a firma ku Estrellas, tabatin otro ekipo di beisbòl dominikano ku tabata su tras. Esaki sinembargo no a kristalisá ni den un kombersashon, i Profar a skohe pa Estrellas Orientales.

Den su dos temporadanan ku Tigres de Licey, Jurickson a kombiná pa bati pa un promedio di 246 ku 2 honron i 7 kareda empuhá den 40 wega. Su mihó temporada tabata esun 2013/2014, ora el a bati pa un promedio di 281 den 25 wega.