CHICAGO.- E utility player yu di Kòrsou Jurickson Profar ta keda menshoná komo un bon piesa pa e ekipo di Chicago Cubs, esaki sea si ke konstruí e klup di nobo òf pone talentonan na posishonnan klave. Profar a pasa shete aña den MLB (shete ku Rangers, un ku A’s i unu ku Padres). Na 2012 el a firma ku Rangers komo gran prospekto.
Profar tin un karera ku averahe di .238 i OPA di.715. Su sifranan no ta un revelashon pero su balor ta sinta den e echo ku e por hunga unda ku posishon’é. Den su añanan den MLB, el a hunga tur posishon ku eksepshon di picher i kècher. No solamente e tin fleksibilidat riba tereno, pero tambe e ta un switch hitter. Ian Happ i Victor Caratini ta e úniko dos switch hitters ku Cubs tin aktualmente.
Profar su posishon faborito ta den outfield, loke ta kai bon pa Chicago. E ta bin di un short season den kua el a bati pa .278 ku Padres i tin solamente 27aña.
Profar lo por yega Chicago na un kosto relativamente barata. El a firma un akuerdo di un aña ku San Diego Padres, na rason di 5.7 mion dòler. Pues Cubs por trese den kas ku un akuerdo ku lo ta ‘team friendly’, pa e yena un posishon kaminda tin gran mester di un hòmber. Esaki lo duna Cubs mas fleksibilidat pa buska mas hungadó.
Nan ta menshoná ku e parti mas mihó pa firma Profar ta su abilidat pa bira mentor di Nico Hoerner. Si Hoerner pasa hopi tempu den Minor League –loke hopi hende ta premirá- tòg Profar por yuda produsí miéntras ku e hóben ta sigui den desaroyo.
Pero si Cubs ta skohe pa un team ku algun veterano, Profar einan tambe lo ta kompetitivo. Hoerner por tuma tempu pa desaroyá miéntras ku e ‘utility man’ por move den tur skina di tereno, esta kaminda David Ross tin mester di dje.
E idea di Profar ta great. Na edat di27 aña ainda e ta hóben, e no ta kostoso, e por move fásil i tin eksperensia den e liga pa bira un hungadó pa subi tereno tur dia. Pues pa esei lo ta un bon desishon pa Cubs firma Profar, segun ta keda konkluí.