WILLEMSTAD.- Nan ta ohochi i talentoso, un ta mediokampista i e otro ta den defensa i ámbos hungando pa Ajax. Parse nan ta birando e Ronald i Frank de Boer nobo di Ajax. Nos ta papiando aki di Jurriën i Quinten Timber di Ajax ku ta sperando ku nan por keda selektá pa hunga ku e ekipo grandi di Ajax e temporada benidero den Eredivisie. E ohochinan di 18 aña ta uzando e preparashon pa temporada nobo pa hasi un impreshon riba e direktor tékniko di e ekipo grandi kende ta Erik ten Hag. Jurriën ta probechando di e ousensia di e afrikano Noussair Mazraoui komo rèksbèk despues di a skor un gol den viktoria di 2-1 kontra di Watford. Su ruman Quienten tin mas konkurensia den medio kampo i a drenta te ainda den partidonan kontra di Quick '20, Aalborg i Anderlecht. Tur e partidonan aki el a sa di hunga den di dos mitar di e partidonan. E ohochinan a kuminsá nan karera huntu ku nan ruman Dylan den Feyenoord pero despues a pasa pa Ajax ya ku tabata mas fásil pa nan mama. E traspaso pa Ajax a sosodé na 2014. Tabatin momentu ku nan tabata karga fam di nan tata kual tabata Maduro pero despues ku e tata a bai laga nan, nan a sinti ku nan mester a honra nan mama i karga fam di nan kerida mama kual ta Timber. Esaki a sosodé na 2014 mes na momentu ku ámbos a firma un akuerdo profeshonal ku Ajax. Aña pasá nan a gana kopa Oropa ku e konhunto ulandes di U17 i nan tin e soño di hunga un dia ku e selekshon nashonal di Ulanda.