WILLMESTAD – Frank De Boer, coach di selekshon nashonal di futbòl di Ulanda a anunsiá su 26 hungadónan ku lo forma e ekipo final pa EuroKopa 2021. E bon notisia ta ku Jurrien Timber, yu di mama yu di Kòrsou a kai entre e skohensianan final di De Boer. Timber lo konosé su promé eksperensia den un torneo grandi na nivel europeo i ku sigur lo yud’e pa alkansá meta di kualke futbolista profeshonal, kopa Mundial. Awor falta solamente tres siman pa e torneo di Europa aki ranka sali ku en realidat mester a tuma lugá for di aña pasa na 2020 pero pa motibu di e pandemia di Covid-19 a keda kanselá.  Ulanda lo hunga nan promé wega dia 13 di yuni kontra Ukrania. Den pasado na solamente un okashon Ulanda a yega di gana e título di kampion di Europa.  Tabatin un total di 34 futbolista den e kampo di entrenamentu i mester a kòrta 8 kual a tuma lugá awe.