WILLEMSTAD.- E organisashon Just 4 Keepers tabatin un fin di siman emoshonante i esei primeramente pa motibu di rekonosimentu ku tres coach dje organisashon a risibí den kuadro di 100 aña di futbòl organisá den nos pais. Coachnan Silvio Albertoe i Henry ”Leo” Plaate djasabra a risibí un pin di konmemorashon pa nan aporte i dedikashon balioso na desaroyo di futbòl lokal. Djadumingu tabata turno na coach Marcello “Chelo” Pisas pa haña rekonosementu pa su karera komo portero. Just 4 Keepers Curaçao i miembronan ta felisitá e coachnan pa nan rekonosementu i ta gradisí nan pa ta parti di nan formashon komo portero.

Seguidamente djadumingu a risibí bishita di trainer di kiper di selekshon di Aruba Sr. Maria, kompañá pa DT i legendario kiper di Ajax Sr. Stanley Menzo, huntu ku kiper di selekshon di Aruba Sr. Eric Abdul ku di forma spòntan a aseptá e invitashon pa partisipá den e training di tur djadumingu mainta. Tabata un training intensivo kaminda hóbennan por a siña hopi i ku e coachnan a risibí tepnan pa por sigui ofresé entrenamentu na e hóbennan portero.

Tur hende por bishita e página di Facebook: Just 4 Keepers Curaçao.

Leo Plaate (r) i Silvio Albertoe entre esnan ku a risibí rekonosimentu.