WILLEMSTAD.- E strea hóben kantadó di tambú di Bándariba, Ludsella ‘Tela’ Sambo ta demostrá un biaha mas ku e ta realmente un kantadó di tambú ku a logra kapta i dominá e zuai berdadero di e kantadónan vèrsá di tambú di ayera.
Na un manera bon kla sin laga duda el a dirigí su mes e aña aki un biaha mas na pueblo di Kòrsou ku vários mensahe di su propio inspirashon. Mensahenan salí di su propio eksperensia.
Riba su CD nobo pa 2019 e ta presentá 7 inspirashon kaminda e ta papia stret i bon kla ku su pueblo. Tela ta bringa abuzu, redu, kudishi, kalumnia, maltrato i ribirishi. Tela ke mira un mundu mihó. E ke mas harmonia, mas honestidat. E ke pa e hende kambia nan bida.
Esnan ku ta hasi malu mester stòp i repentí, pasobra tur loke ku bo hasi aki na mundu ta aki mes bo ta paga pe.
Manera Tela ta kanta t’aki na mundu mes ta fièrnu i t’aki na mundu mes ta shelu.
E CD ta karga e nòmber ‘Kachó ku morde bu ta su lana mes ta kura’, un komposishon di Elia Isenia. Tur sobra kantika ta inspirashon di Ludsella ‘Tela’ Sambo.
Riba e CD tin e siguiente obranan di Tela: Bis’e pa mi – Mi’n tin trabou ku bo – Den bo kara – Riba mundu ta pag’e – Un granito – Mi orguyo – No puntra dikon.
Manera ta kustumber un kantika ‘telelele’ no por keda’fo.
Tela ta un di e kantadónan di tambú ku semper a sigui kanta tambú telelele.
Pa pedido di CD por yama 516-2639.