WILLEMSTAD.- Atletiek Vereniging Sparta i Freewinds ta anunsiá ku e  konsierto ku mester a tuma lugá dia 31 di òktober riba Freewinds ta sigui dia 6 di novèmber 2017. Motibu di e kambio aki di fecha ta pasó e Barku Krusero Freewinds pa motibunan fuera di alkanse lo no por bini Kòrsou mas e siman aki.
Tur hende ku ya a kumpra nan karchi por ta trankil pasó 6 di novèmber e tremendo konsierto pa rekoudá fondo pa tim di atletismo di ‘AV Sparta’ ta kontinuá den gran forma.
Esnan ku ainda no tin nan karchi tin oportunidat pa kumpra un karchi i kontribuí na un bon kousa.
E konsierto aki ta unu bon balansá ku artistanan lokal di taya ku a pone nan mes gratuitamente disponibel huntu ku Freewinds Band pa deleitá tur ku aportá na e organisashon di atletismo ku ta traha na bienestar di nos hóbennan lokal.
E artistanan ku ta presentá e anochi ei ta, Ebony-Gwen, Roald Balentien, Melania Van der Veen i Reinier Lijfrock. Ta algu espektakular, pa por haña tantu artista lokal di taya huntu un anochi pa solamente 25 florin pa persona. Manera ya a bira kustumber, AV Sparta ta sòru pa kada konsierto tin un toke spesial i e biaha aki lo tin un sorpresa pa tur ku sostené e ‘fundraising aki’; P’esei AV Sparta huntu ku Freewinds ta invitá pueblo di Kòrsou pa hasi uso di oportunidat di disfrutá abordo di Freewinds i mesora aportá na un bon kousa.
Tin algun karchi mas optenibel tantu seka e atletanan, direktiva di Sparta (540-2414). Lo tin karchi optenibel na porta pero e kantidat lo ta limitá.
Pa mas informashon relashoná ku e proyekto di AV Sparta i/o pa hasi un donashon por tuma kontakto ku sr. Raymond Jansen na telefòn 540-2414 òf por hasi un depósito riba number di kuenta Giro Bank 114422 Atletiek Vereninging Sparta.