PARIS, FRANSIA (AFP).- Faltando tres dia pa elekshonnan parlamentario na Fransia, ku por kondusí na un gobièrnu di ekstremo derecho, e kampaña elektoral a bira tenso ku agreshon kontra dje bosero di gobièrnu i un yamada pa “eliminá” abogadonan.
“Awor mas ku nunka mester bai vota. E ta realmente urgente. “Nos no por laga e pais den man dje hendenan ei”, segun e kapitan di selekshon franses di futbòl, Kylian Mbappé despues dje resultadonan katastrófiko dje promé buèlta di elekshon.
E partido ultra derechi Agrupashon Nashonal (RN) di Marine Le Pen i su aliadonan na e okashon ei a haña un tèrsio dje votonan, dilanti di e koalishon di iskierda Nuevo Frente Popular (NFP, 28%) i e aliansa di sentroderecha dje presidente Emmanuel Macron.
For di e promé buèlta dia 30 di yüni, e tenshon no a stòp di oumentá riba kaminda pa resultadonan di 7 di yüli, ku agreshon verbal òf físiko di kandidatonan òf esakinan su simpatisantenan, entre nan e bosero di gobièrnu Prisca Thevenot.
Kuater persona, entre nan tres menor, a keda detené pa e susesonan aki den Meudeon, den zùitwèst di Paris. E funshonario mes no a resultá heridá, pero dos persona di su ekipo si mester a haña atenshon médiko.
Thevenot, yu di inmigrantenan di Mauritius (ost di Afrika), algun ora promé a alertá pa “oumento di deklarashon i atakenan rasista”, “hendenan kara tapá”. “Mi tin miedu”, segun el a bisa na e kadena TF1, komo “mama di dos yu mestiso”.
“Nos por oponé di forma demokrátiko, pero nos no por ataká verbal òf físikamente, manera desgrasiadamente a tuma lugá durante dje kampaña aki”, segun e promé minister Gabriel Attal a lamentá.
Vários kandidato dje diferente partidonan a keda menasá i/òf maltratá durante dianan tras di lomba.
