WILLEMSTAD.- Selekshonnan di Kòrsou tin dos wega ganá i 0 pèrdí den e kampionato Latino Americano di Intermediate ku ta tumando lugá den Stadion Post 6. Djamars Kòrsou Pariba a gana di Colombia ku skor di 22 pa 10, miéntras Kòrsou Pabou a gana di Aruba 15-4.  Djaluna tambe Kòrsou Pariba i Pabou a gana den nan kompromisonan. Den e otro weganan di djamars, Mexico a gana Colombia 12-2, Aruba a gana Mexico 9 pa 7. Djárason 29 di yüni i djaweps 30 di yüni lo no tin wega di e kampionato Intermediate, debí na medidanan di prekoushon ku Gobièrnu a tuma (toke de keda) en konekshon ku Tormenta Tropikal Bonnie. Toke di Keda ta start for di 4 or di atardi djárason te ku próksimo aviso.  A programa weganan pa djabièrnè kaminda selekshonnan di Liga Pabou i Liga Pariba lo hunga Doubleheader. Djasabra ta pendiente pa hunga semi-final i final riba mesun fecha. Ta pidi pa tur persona i hungadó envolví den e Kampionato Intermediate pa keda pendiente di e desaroyonan i notisia di e komishon organisadó.

Aruba 9, Mexico 7

Aruba tabatin 8 hit ku 3 eror. Noah Hewitt a gana. Regan Koolman ku Jeandrey Winterdal, ámbos a bai di 1-1. Zair Tromp, Noah Hewitt ku Justin Hernandez. Tur a bai di 2-1.  Pa Mexico 9 hit ku 1 eror.

Leonel Alexis Bustos Gutierrez a pèrdè i e mes a bati di 1-1. Fernando de la Rosa a bai di 3-2.

Mexico 12, Colombia 2

Mexico tabatin 8 hit ku 1 eror. Guillermo Hernandez tabata ganadó. Sebastian Rivera Berlanga a bai di 2-2. Jose Carlos Jaime Montes, Alexis Manuel Cervantes Garza ku Fernando de la Rosa, tur a bati di 1-1. Colombia a dal 4 hit i hasi 4 eror. Jesus Sarmiento Pelaez a resultá pèrdèdó.  Mathew Naid Contreras a bai di 2-2 i Ivan Martinez Aparicio a bai di 2-1.

Kòrsou Pariba 22, Colombia 10

Kòrsou Pariba a dal 13 hit i nan a kometé 4 eror. Deverson Papa tabata ganadó. Jurrion Eugenia i Zidanne Attaf, ámbos di 1-1. Tayrino Bautisma ku Ayden Calmes, tur 2 a bati di 2-1. Tizaino Maximiliana a bai di 3-3 i Simon Rodriguez di 3-2. Colombia tabatin 11 hit ku 3 eror. Santiago Cabarcas Rojas a resultá pèrdèdó. Jesus Sarmiento Pelaez a bai di 1-1. Emmanuel Cabadia a bai di 2-1. Ivan Martinez Aparicio a bai di 2-2. Santiago Cabarcas Rojas ku Nestor Lloreda Torres, ámbos di 2-1.

Kòrsou Pabou 15, Aruba 4

Kòrsou Pabou tabatin 17 hit ku 1 eror. Derickson Doran tabata ganadó. Cleaten Sille a bai di 2-2. Jay-dair Kopra, Zazil Schoop i Rigadon Raap, tur 3 a bai di 1-1. Reagan Randt Kirindongo, Isaac Acosta i Shackleyson Margarita, tur a bai di 2-1. Sherrintley Da Costa Gomez a konektá 1 homerun. Pa Aruba 4 hit ku 3 eror. Regan Koolman a resultá pèrdèdó. Jovin Willems i Noah Hewitt, ámbos di 1-1 i Xyron Jacobs a bai di 2-1.

...Selekshon di Aruba ku rèkòrt di 1 wega ganá i 2 pèrdí den e Intermediate Latino di selekshon di Pariba Jerryson Beaumont den entrevista ku Extra...

...Selekshon di Kòrsou Pariba ku tin rèkòrt di 2-0...

...Picher Kyle de Haseth di Liga Pariba...

..Umpirenan deliberando durante e kampionato Intermediate ku ta tumando lugá na Kòrsou. Djárason i djabièrnè no tin wega...

...Selekshon di Mexico den dugout...

Lesadónan di kolumna Extra Intermediate, bon dia. Nos tei ku mas informashon di e kampionato Latino Americano di Intermediate ku a start ofishalmente djaluna ku dos wega den Stadion Post 6. Tin algun kambio den skèdjel i dependé kon bai ku wer aki na Kòrsou lo bini mas kambio den skèdjel. Ekiponan di Kòrsou tabata sólido riba e promé fecha. Kòrsou Pariba a nòkout Aruba ku skor di 13-0, miéntras ekipo Kòrsou Pabou a dal Colombia 17 pa 3. Ayera mester tabatin 4 wega en bes di 3 wega. Mester hunga mas tantu wega posibel pendiente kiko ta bai pasa ku Siklon Tropikal ku ban spera no bira Tormenta Tropikal.

* * * * *

Bon públiko riba e promé fecha, pero no yen yen ainda. Den tribunanan tras di home plate tabatin algun lugá. Selekshon Colombia a habri ku un picher ku un estatura impreshonante ku ta Angel Torres Fernandez.  E kècher di e selekshon di Kòrsou ku ta Gilvelton Josephina a dal e picher menshoná un line drive durísimo ku a bai para den rightfield kòrtiku. Gilvelton ku tin bon spit tambe a kore te segunda. Despues Gilvelton Josephina a konektá 2 doblete mas i un tripel. Gilverton a bati di 4-4 ku 3 doblete i un tripel ku batasonan pa left, center i right. Batiendo e bala ku outoridat riba tur parti di tereno.

* * * * *

Na momentu ku e picher estelar di selekshon di Colombia a risibí e line drive, por a mira klaramente ku e no por a picha mesun efektivo mas.  Despues di 3 inning e manager di e ekipo di Colmbia a kambia e estelar Angel Torrez Fernandez.  E primera base di e selekshon di Kòrsou Reagan Randt Kirindongo, a dal e promé homerun di e torneo. Un bataso feros pa centerfield na momentu ku e wega tabata pèrtá ainda ku skor di 2-1 pa Kòrsou.  E homerun tabata kontra e picher velos Angel Torres Fernandez. Reagan Randt Kirindongo ta yu di e pelotero Randy Kirindongo di Wild Cats. Su mama ta Niciela Randt, hendenan hopi konosí pa nos.

* * * * *

Kòrsou Pabou a usa kuater picher pa logra e viktoria djaluna. Jar-diar Kopra, un tremendo picher slengu a bai ku e viktoria pa Pabou tirando 7 ponche. Pichernan Shakleyson Margarita, Quin Usla i Sherrintley da Costa Gomez a tira pa Kòrsou Pabou.  Hopi interesante i importante ta kon e maneho riba e nivelnan aki di Little League ta usa nan pichernan durante serinan kòrtiku. Tene kuenta ku ora ‘double header’ kai aden, dianan di sosiegu ta keda konta normal.  Mester hasi menshon tambe di e picher di Pariba Ayden Calmes ku tabatin un tremendo aktuashon tirando 3.2 inning di blankeo kontra e selekshon di Aruba. Den 3.2 inning Ayden Calmes a tira 10 ponche, ke mèn ta algun bateadó a hasi kontakto. Bateadónan Franjean Haseth, Raynor Martis, Lodymar Cathalina, Tayrino Boutisma, Guillon Sebastiana i Kyle Haseth a dal dos hit pa e selekshon di Liga Pariba.

* * * * *

Mexico a sali riba bon dia djamars kontra di Colombia. Mexico ta úniko selekshon ku no a mira akshon djaluna. Den pasado Mexico a presentá ku bon selekshon den kampionato Latino di Intermediate aki na Kòrsou. Extra digital a bolbe skor haltu ku tremendo transmishon di e dos weganan i di e apertura ofishal ku algun close up den gran forma. Pa djamars lo tin ‘slow motion’ tambe riba hugadanan. Extra digital tei riba tur e plataformanan, esta Facebook, You Tube i extra.cw.

* * * * *

Tur dia nos tin un página dediká spesialmente na e kampionato Latino.  Ayera nos selekshon Senior ku ta na Puerto Rico (Guayama) mester a topa ku selekshon number 1 di Puerto Rico. Na final di e kolumna aki nos lo tin e resultado final. E selekshon Senior ku ta kargá ku prospektonan pa firma, no a hunga na nan nivel den e promé weganan i a logra gana solamente Virgin Island pa klasifiká. Bèk pa Kòrsou, awe djárason tin dos wega programá, pero ta pendiente di desishon di e komishon organisadó. Bon trabou di e crew ku ta traha riba tereno na Post 6 enkabesá pa Neldrick Lourens. Nos ta keda te aki i mañan nos lo tin mas informashon di Intermediate Latino.