ATENAS, AP.- Un sentro di refugiado a sende na kandela riba e isla griego Lesbos, segun servisio griego di bombero djadumingu. E kandela a kousa dañonan konsiderabel den un depósito pero ningun persona a resultá heridá.
Ta trata di e segundo kandela den un instalashon konstruí pa migrantenan, despues ku personanan deskonosí a sende un sentro di migrante na kandela djaluna último. E depósito, kual tabata kontené muebelnan i vários aparato pa kas, a keda kompletamente destruí segun indikashon di un bosero di bombero ku kondishon pa keda anónimo mirando ku e investigashon relashoná ku e suseso aki no a terminá ainda.
Turkia i Union Europeo ta meimei di un bataya pa determiná ken ta responsabel pa miónes di migrante i refugiadonan ku ta riba e teritorio turko. E gruponan aki a kuminsá kongregá dilanti di e frontera griego.
Vários hóben a tira piedra riba polis griego i a purba basha un separashon na frontera abou den un intento desesperá pa drenta e pais. Por lo ménos dos migrante a resultá heridá entre e susesonan aki.
