WILLEMSTAD.- Clifton End ta bèk ku otro produkshon ku manera ya ta kustumber, ta primintí di tembla kaya.

‘Kandela’ ta parti di e serie kansionnan Rítmiko manera ‘Slow Dance’ ku Ephrem J i mas resien ‘Morena’. Ainda mester sali ‘Baila Conmigo’ pa asina klousurá un etapa musikal di Clifton su karera, unda el a marka pouta den e géneronan di Kizomba, Reggaeton i Ritmo Kombina. E EP tan esperá ku tentativamente lo ta titulá ‘Mi Pais’, ketu bai ta plania pa sali fin di aña aki.

‘Kandela’

“E proseso pa krea ‘KANDELA’ a bai hopi vlòt i nos ta orguyoso ku e resultado final”, Clifton a kompartí, unda huntu ku Vincent da Silva Jr. nan a skibi i areglá e piesa den un anochi. E kantika ta un meks di papiamentu, spañó i ingles ku ta papia di un amor ardiente ku mester keda sasiá. ‘Kandela’ ta un kolaborashon ku e talentoso produktor di Kizomba PutoX, huntu ku Vincent da Silva Jr. i Sonic Wizards.

2021 lo ta ‘soulful’ manera Clifton a anunsiá anteriormente, ora aña bòltu, e ta bai bèk na su promé amor, kual ta músika ‘soul’ unda e ta plania pa lansa algun piesa en espera di su álbum dediká na e género aki.

Clifton no por warda pa e pandemia di COVID-19 ta tras di lomba pa asina medidanan rònt di farándula por normalisá atrobe. Ora e momentu oportuno presentá, Clifton ke regresá nos islanan pa algun presentashon unda pueblo por selebrá responsablemente ku otro. No keda sin pidi pa ‘Kandela’ na tur radio emisora i televishon popular di nos islanan i sigui Clifton End riba Facebook/BuzzBinProductions pa keda na altura di futuro produkshonnan.