KRALENDIJK – Un kandela ku a surgi den oranan di mardugá di djaweps, a kousa daño grandi na un kompleto di lots na Kaya Industria. Imágen di kámara di siguridat a kapa
momentu ku un hòmber a subi tereno di e kompleho ku un palu na kandela na su mana pa djis un ratu despues e kandela originá.

Polis ta studiando e imágen pa yega na detené e persona ku a kometé e echo kastigabel aki. Den kareda di 3’or di djaweps mardugá a bati alarma pa un kandela grandi na un kompleho di lots ku ta keda na un kaya banda di Kaya Industria. Ta trata aki di kuater lots ku ta usa pa garashi i tambe negoshi di artesania. E kandela a kuminsá na e lots mas na sùit i a ekspandé rápidamente pa e otro dos lotsnan. Brantwer ku diferente unidat a yega na e sitio i mesora a kuminsá kombatí e kandela ku tabata hopi grandi. E último
lots a sufri daño parsialmente.
Bomberonan mirando e grandura di e kandela i por ekspandé pa edifisionan den besindario, un dado momentu no a duda a pidi asistensia di e crashtender ku ta usa na aeropuerto pa asina por dominá e kandela. A dura mas ku tres ora pa por a kaba paga e kandela kompletamente.

Den e kompleho di lots tabatin dos garashi i un negoshi di artesania. Den e promé lots, kaminda e kandela a kuminsá, tabatin kantidat grandi di tayer, bateria i zeta. Esaki tambe
a kondusí ku e kandela a ekspandé asina lihé i bai pa e otro lotsnan.
E daño ta grandi meskos tambe e pèrdida di propietario di e garashinan. Informashon ku Extra a risibí ta indiká ku tabatin sigur dies outo den e promé lots i den e otro seis outo, entre nan un limusin. Doño di e último garashi mesora a akudí na e sitio i a trata pa habri porta di kurá pa asina drenta pa saka e outonan, pero polisnan no a lag’é drenta mirando e peliger di eksploshon ku tabata tumando lugá na e momentu ei.
Imágen di kámara di siguridat ta duna bista kla kon un hòmber delegá ku kara tapá i kamisa manga largu poko promé ku e kandela a surgi a subi e tereno ku un palu na kandela na su man. No tin niun duda ku ta e persona aki a pega e kandela intenshonal.
Extra a komprondé ku e negoshinan den e kompleho ta segurá, pero ta sintá awor ku e problema ku seguro lo no bai kubri e pèrdida komo ku e kandela ta sendé intenshonal.