WILLEMSTAD.- Fin di siman ku ta tras di lomba tur esnan ku ta biba na Ulanda i esnan aki na Kòrsou via di retnan sosial por a tuma nota dje partisipashon di tres kantante yu di Kòrsou ku ta partisipando na ‘The Voice Senior’ na Ulanda.
René Bishop, Lou Prince i Eddy Grovell den nan promé presentashon den ‘Blind Auditions’ a kousa impakto ku nan kanto i a klasifiká pa kontinuá den e kompetensia.
E video di nan presentashon a subi retnan sosial i for di tur huki nan a risibí atenshon i sosten.
René Bishop a presentá ‘Unchained Melody’; Lou Prince a presentá ‘See you when I get there’ i Eddy Grovell a interpretá un medley di dos kansion di Barry White titula ‘Let the Music Play’ i ‘You’re my first, my Last, My Everything’.
Lou Prince pa medio di un e-mail a gradisí tur su paisanonan ku a sostené durante di su partisipashon. ‘Un sentido di orguyo a yena mi, mi kasa i yunan. Durante añanan ku mi tin na Ulanda, dos kos a keda igual: Mi amor pa Kòrsou i e gana di saka nos kara tur ora!’, asina Lou Prince a indiká.
Djabièrnè awor ta fecha pa nan siguiente presentashon den ‘The Voice Senior’ i nos ta spera ku nan lo por sigui konta ku e sosten di nos tur.