Temblor a tuma lugá nèt ora hendenan tabata den misa

PORT-AU-PRINCE.- E kantidat di mortonan na Haiti despues di e teremoto ku a dal e pais ayera mainta ta sigui subi. E temblor di 7.2 riba eskala di richter a kosta ya kaba 724 morto. Trahadónan di reskate huntu ku sivilnan ta trahando duru pa trata na saka hendenan ku a sobrebibí e temblor for di ruinanan. Krus Kora den diferente pais i aki na Kòrsou tambe ta hasiendo preparashon i den sierto kaso a kuminsá yuda.

Retnan internashonal ta informando ku e kantidat di hendenan ku a keda herida a yega 2800 kaba miéntras ku segun informashonnan ta sigui drenta ta sali na kla ku e daño den sur di e pais ta realmente hopi serio. Gruponan di reskate tin miedu sinembargo ku e tormenta tropikal Grace si lo por brua asuntu kompletu. Segun e instituto merikano National Hurricane Center, Grace lo por yega Haiti mayan djaluna.

Krus Kora internashonal ta konsentrá su yudansa brindando asistensia den trabou di búskeda i reskate di sobrebibientenan, kuido médiko agudo i tambe refugio.

Segun informashonnan, vários edifisio manera kasnan, negoshinan i asta hospital a basha den otro debí na e temblor. E temblor a pasa nèt momentu ku hendenan tabata den misa i ta ei e Trahadónan di reskate ta pensa ku lo por tin sobrebibiente ainda.